Пред само неколку моменти, чешкиот производител ги објави деталите околу освежената Fabia.
Еден од најважните новитети кај освежената Fabia се редизајнираните предни и задни светла кои користат LED технологија. Новите предни светла се дел од редизајнираниот преден дел, кој според дизајнерите на Škoda сега „зрачи со свежа енергија и елеганција.“ Секако, ќе забележите многу ситни изменети детали на екстериерот – редизајнирани се и браниците, а дел од фејслифтот се и нови бои и нови алуминиумски тркала, кои сега можат да бидат во дијаметар до 18 инчи.
Редизајнирана е кабината – па сега има нови материјали и бои, нови функционалности и нови практични додатоци – редизајнирани се инструментите, има нови можности за материјали во кабината, а Škoda додаде и неколку Simply Clever додатоци – патниците на задната клупа ќе добијат USB конекции за полнење на разно-разни уреди, како и држач за таблети, а во багажникот ќе можете да добиете двостран патосник и LED батериска ламба.
Основен мотор и понатаму ќе биде 1-литарскиот MPI со 60 или 75 коњски сили, а чекор погоре е 1-литарскиот TSI кој може да биде со моќност од 95 или 110 коњски сили. Најмоќниот мотор ќе може да се комбинира и со DSG менувач со двојна спојка.
Освежената Škoda Fabia ќе го има своето официјално деби во Женева – кога ќе имаме уште повеќе информации и фотографии од популарниот хечбек.
