Renault продолжува да ги опипува премиум водите со луксузниот Megane Akaju – CARclub.mk | #1 за Автомобилите full screen background image
Search

Renault продолжува да ги опипува премиум водите со луксузниот Megane Akaju

Францускиот бренд продолжува да ги бутка своите модели во повисоките и поскапи сегменти – и по неколкуте Initiale Paris модели, дојде ред и на Megane и новиот Akaju.


Всушност, Akaju е ниво на опрема кое доаѓа над (досега врвните) Limited и GT изведби. Akaju е базиран на Intens спецификацијата, но автомобилот добива цела гама на ексклузивни доработки кои би требало да го издигнат едно ниво погоре.

Меѓу другото, ќе добиете специјални и уникатни 18-инчни тркала, затемнети задни стакла, ентериер покриен во црна и кафена кожа, детали од брусен алуминиум, загревање на предните седишта (и функција за масажа на возачкото седиште), Bose премиум аудио систем, head-up дисплеј, како и новиот R-Link 2 мултимедијален систем со 8.7-инчен дисплеј. Всушност, Megane Akaju добива скоро сè што може да се добие кај Megane – освен адаптивниот темпомат, системот за автоматско паркирање и сончевиот покрив.

Купувачите ќе можат да изберат меѓу неколку погонски единици – ќе можат да го нарачаат со 130-коњскиот TCe турбо-бензинец, или пак со еден од dCi турбодизелите кои нудат 110 и 130 коњски сили. Врвната изведба со сите дополнителни опции (вклучувајќи ги и трите спомнати погоре) во Франција ќе чини околу 33.000 евра.

 

 

Akaju ќе остане врв на понудата во гамата на Megane сè до официјалното претставување на Megane RS во Септември оваа година.

 



Алфа и Омега на CARclub. Играчките остануваат, само стануваат поскапи.