Малку несекојдневно (и дефинитивно неочекувано), Audi реши да го искористи Worthersee за да претстави верзија на A5 Sportback преработена да работи на природен гас!
Срцето на Audi A5 Sportback G-Tron е 2-литарски TFSI турбо-бензинец кој испорачува 170 коњски сили и 270 Nm вртежен момент. Овој мотор е преработен да работи на CNG (компримиран природен гас), а од Audi потврдуваат дека ова не е само концепт – A5 Sportback G-Tron ќе биде официјално лансиран ова лето.
Германскиот бренд е еден од ретките премиум производители кои продаваат автомобили кои се придвижувани од бензински мотори кои можат да работат на природен гас. Audi во своето портфолио има неколку вакви модели – A3 Sportback G-Tron и А4 Avant G-Tron, а A5 Sportback G-Tron ќе биде третиот модел во понудата.
Уникатната најава подготвена за Worthersee доаѓа со уникатен екстериер во двобојна комбинација и специфична графика. Можеме да забележиме и сини акценти во предните светла, на сопирачките и на неколку други места.
За пренос на Worthersee возилото е задолжен S-Tronic автоматски менувач со двојна спојка, но серискиот модел ќе се нуди и со мануелен менувач. Резервоарите за CNG се поставени во задниот дел и имаат капацитет од 19 килограми. Овие резервоари имаат уникатна и комплицирана конструкција – бидејќи треба истовремено да бидат и лесни и мошне издржливи. Автомобилот може да постигне 100 километри на час за респектабилни 8.5 секунди, а максималната брзина е 226 километри на час.
