Чешкиот бренд продолжува со обновување на гамата на Octavia, а покрај седанот и караванот заедно со спортските RS варијанти, сега на ред дојде и рестилизирање на Octavia Scout.

Оваа теренски настроена изведба и понатаму се базира на караванската Octavia, а покрај повишеното растојание од подлогата за дополнителни 30 милиметри, располага и со дополнителни заштитни елементи на екстериерот, кровни носачи, поголеми алуминиумски тркала, електронско заклучување на диференцијалот и богата опрема.

Секако, како и кај останатите верзии од обновената Octavia, и Scout добива изменет преден дел со нови LED светла и помодерна решетка по примерот на поголемиот Superb. Исто така, помали измени претрпеа светлата за магла, задните светла и внатрешноста, од која сеуште не се објавени фотографии. Она што се знае е дека во внатрешноста е предвиден нов систем за информации и забава со екран од 8.0 или 9.2 инчи, како и опционален волан со греење.

agasrdth

Треба да се потсетиме дека Octavia караван има багажен простор со зафатнина од 610 литри со кренати и 1740 литри со наклонети седишта, а истото важи и за оваа Scout изведба. Што се однесува до погонските единици, во палетата се 2.0 TDI со 150 кс, кој сега може да се усогласи со седум-степена DSG трансмисија со двојна спојка, потоа 2.0 TDI со 184 кс и бензинецот 1.8 TSI со 180 кс.

Продажбата на рестилизираната Octavia Scout ќе започне во почетокот на наредната година, додека цените ќе бидат соопштени веднаш потоа.