Компанијата објави дека ќе лансира флота со повеќе од 100 автономни возила со цел да може во реални услови да ги истражи идните системи за поврзаност и автономно возење на своите модели.
Иницијалните тестови кои се планирани ќе се фокусираат на комуникацијата од возило до возило, но и од возило до околната инфраструктура. Ова ќе им овозможи на возилата да комуницираат меѓусебно, но да комуницираат и со околината околу нив – знаци, семафори, итн. Првите тестови ќе започнат кон крајот на годината.
Понатаму, ќе се работи на развивање на цела лепеза нови безбедносни системи. Првиот систем се нарекува Roadwork Assist и користи предна стерео камера за да генерира тродимензионална слика од патот пред возилото. Оваа слика се анализира за автомобилот да може да препознае бариери и други детали кои обично се користат при изградба и реновирање на патишта. Овој систем ќе се користи за автомобилот да препознае кога се наближува до некаква работа на патот и да го најде најефикасниот пат за да помине низ оваа зона. Системот дури ќе може и да управува со возилото и да го држи во средината на неговата коловозна лента.
Британскиот производител работи и на Safe Pullaway систем кој користи стерео камера за да го надгледува просторот директно пред возилото. Ако има некој објект – на пример ѕид или пак друго возило, сопирачките ќе бидат активирани а возачот ќе биде предупреден да не пробува да забрзува. Понатаму, JLR работи и на еден поголем систем кој го нарекува Over the Horizon Warning кој користи радио сигнали за да им овозможи на возилата да комуницираат меѓусебно – а една од најважните функционалности е кога возило ќе запре или се движи премногу споро, ќе испрати Hazard Alert сигнал до околните возила за да ги предупреди за состојбата.
Конечно, компанијата развива и Emergency Vehicle Warning систем кој е наменет за комуникација меѓу патничкото возило и возилата од итните служби. Кога е повикано соодветно возило од итните служби, возачот ќе добие аудио и визуелен сигнал кој ќе му даде на знаење од која насока доаѓа возилото од итните служби и колку е оддалечено во моментот.